தளிர் நிலவே

தத்தி தத்தி நடந்து வா !
தங்க குட்டி நடந்து வா !
முத்து பற்கள் காட்டியே
முயல் குட்டி நடந்து வா !
சின்ன கால்கள் சிவந்திடாமல்
சிறிது  சிறிதாய் நடந்து வா!
வண்ண பாதம்  மண்ணில் பதிய
வளர் பிறையே நடந்து வா!
தத்தி நீயும் நடக்கையிலே
தங்க கால்கள் சிவக்குதே!
தாவி நீயும் விழுகையிலே
தாயின் மனம் தவிக்குதே !
பட்டு பாதம் வலித்திடுமே
பவள மல்லி நடக்கையில்
தாங்கி நானும் ஏந்திடவா?
எந்தன் இரு கைகளில்!
எட்டி எட்டி அடிகள் வைக்க
ஏங்கி கிடந்த மனமிது !
தட்டு தடுமாறுகையில் தாவி அணைக்க
துடிக்குது!
சிட்டு குருவி போல நீயும்
பட்டு பதம் வைப்பதை
வானில் மிதக்கும் திங்களது
கண்டு ஏக்கம் கொள்ளுதே  !
கையில் கிடைத்த பொம்மையெல்லாம்
கண்டு எடுத்து அணைத்திடும் -கட்டிக்
கரும்பே உன்னை கண்டு
அஃறிணையும்  சிரித்திடும்!
குட்டி குட்டி குறும்புகளால்
கோபம் கொள்ள வைக்கிறாய்!
உன் குறு நகையின் அழகினிலே
கொண்ட கோபம் அழிக்கிறாய்!